ВЕСТИПОЛИТИКА

СДСМ бара проширена истрага за Јанушев: Возачот нема моќ да вработува, тој е само посредник во скандалот со митото

СДСМ преку портпаролката и членка на ИО, Богданка Кузеска денеска упати обвинувања на сметка на генералниот секретар на Владата, Игор Јанушев, по приведувањето на неговиот возач за примање мито. Од партијата го оценија оградувањето на Јанушев како обид за бегство од одговорност, обвинувајќи дека актуелната власт на премиерот Христијан Мицкоски функционира како „организирана криминална група“ во која пипалата почнуваат од возачите, а завршуваат до највисокиот владин врв.

Според Кузеска, се отвора клучното прашање за улогата на Јанушев во овој скандал со мито за вработување пожарникар во Град Скопје. Од СДСМ посочуваат дека еден возач нема никаква моќ да вработува, туку таа моќ ја има генералниот секретар, изразувајќи сомнеж дека приведениот е само негова продолжена рака и посредник. Опозицијата потсетува дека ова е втор скандал поврзан со кабинетот на Јанушев годинава, посочувајќи на претходниот случај со неговиот посебен советник за економски прашања кој беше осомничен за лихварство и перење пари.

Во денешното обраќање, портпаролката на СДСМ изнесе и дополнителни тврдења за наводни нецелосни анкетни листови и непријавен имот. Според тврдењата на партијата, Јанушев поседува бугарски пасош и непријавен капитал поврзан со бугарската компанија „Флугбан транс“, како и подарен имот во строгиот центар на Скопје вреден 325.000 евра, лоциран во истата зграда каде што имот поседува и министерот за внатрешни работи Панче Тошковски. Дополнително, од партијата повторно го актуализираа и случајот со милионските договори на „Маратон груп“.

Поради сите овие наводи, од СДСМ категорично бараат целосна истрага која нема да запре само на возачот, туку ќе се прошири и на улогата на неговиот шеф. Опозицијата инсистира истражните органи да ги проверат и наводите за фирмата во Бугарија, подарениот имот и целата мрежа околу Владата, порачувајќи дека граѓаните заслужуваат одговори и дека одговорност мора да има.

Возачот на Игор Јанушев барал 1.500 евра поткуп за да вработи пожарникар, заврши во притвор

Возач на висок владин функционер, вработен во Службата за општи и заеднички работи на Владата, заработи 30-дневен притвор откако бил фатен на дело како прима поткуп, соопшти Основното јавно обвинителство за гонење на организиран криминал и корупција (ОЈО ГОКК).

Возачот на Игор Јанушев барал 1.500 евра поткуп за да вработи пожарникар, заврши во притвор

Според официјалните информации од Обвинителството, истражната постапка за кривичното дело „примање награда за противзаконито влијание“ е иницирана по пријава на граѓанин. Од ОЈО ГОКК информираат дека осомничениот, во периодот од 24 јули до 4 септември годинава, побарал 1.500 евра за да го искористи своето претпоставено влијание, ветувајќи му на оштетениот дека ќе посредува кај службени лица во Град Скопје за вработување по распишан оглас за прием на пожарникари. Осомничениот бил затекнат на 4 септември при примопредавање на 500 евра кои биле претходно обележани, по што судија на претходна постапка му одредил притвор поради опасност од бегство, влијание врз сведоци и повторување на делото.

Back to top button