
Членката на Извршниот одбор на СДСМ, Рената Младеновска, на денешната прес-конференција ја обвини владата предводена од Христијан Мицкоски за економски и социјален колапс, посочувајќи дека работниците осиромашуваат, а државниот буџет се одржува преку скапи задолжувања.
Според Младеновска, минималната плата останува закована на 26.000 денари, додека потрошувачката кошничка со вклучени трошоци за кирија достигнува околу 90.000 денари. Од опозициската партија наведуваат дека актуелната власт ги одбила нивните предлози за минимална плата од 600 евра и за дополнителна финансиска помош на земјоделците кои, како што велат, се оставени да пропаѓаат.
Младеновска посочува дека буџетскиот дефицит се очекува да надмине 900 милиони евра, додека за пензиите недостига околу една милијарда евра. Од СДСМ обвинуваат дека за само две години е создаден нов долг од околу четири милијарди евра преку скапи кредити, што според нивните пресметки го искачува вкупниот долг над 63 проценти од бруто-домашниот производ.
Како што информираат од опозицијата, државата годинава плаќа околу 350 милиони евра само за камати, што е за 120 милиони евра повеќе од средствата наменети за социјална помош. Младеновска обвини дека овие буџетски средства не се наменуваат за повисоки плати или услуги за граѓаните, туку завршуваат во сомнителни тендери, порачувајќи дека премиерот ќе мора да сноси одговорност за промашените политики.









