
Првиот музички фестивал Daisy Chain Fields, основан од Оливија Родриго, собра вкупно 20 милиони долари за организации што работат на здравјето, правата и економската сигурност на жените и девојките.
Фестивалот се одржа на 29 август во Ирвин, Калифорнија, пред околу 45.000 посетители, а на сцената настапија повеќе познати музички имиња, меѓу кои Аланис Морисет, Чапел Роан, Doechii, Mitski, Garbage, Bikini Kill и The Breeders.
За време на завршниот настап Родриго објави дека фестивалот успеал да собере 10 милиони долари. Потоа на сцената ѝ се придружи филантропката Мелинда Френч Гејтс, која преку Pivotal Ventures најави дека ќе ја удвои сумата со дополнителни 10 милиони долари.
Така, вкупниот фонд достигна 20 милиони долари.
Парите ќе бидат распределени меѓу десет непрофитни организации, меѓу кои Baby2Baby, Black Mamas Matter Alliance, Center for Reproductive Rights, FreeFrom, Johns Hopkins Center for Indigenous Health, National Domestic Workers Alliance, National Women’s Law Center и Planned Parenthood.
Организациите работат во различни области – од репродуктивното и мајчинското здравје, преку помош за жртви на родово базирано насилство, до економска поддршка и заштита на работничките права.
Daisy Chain Fields беше замислен како фестивал што музиката ќе ја поврзе со општествениот ангажман. Организаторите уште пред настанот најавија дека 100 проценти од нето-приходите ќе бидат насочени кон организации кои им помагаат на жени и девојки.
Покрај концертите, на фестивалот имаше и простор во кој посетителите можеа директно да се запознаат со работата на организациите што ќе ја добијат финансиската поддршка.
Концептот беше споредуван и со легендарниот Lilith Fair од 1990-тите, фестивал кој ги собираше водечките женски музички имиња и истовремено поддржуваше организации за женски права.
Со 20 милиони долари собрани уште на првото издание, Daisy Chain Fields стартува како еден од позначајните нови музички фестивали со силна филантропска компонента.
Родриго веќе најави дека фестивалот ќе продолжи и во 2027 година.
