Народна банка бара нов сопственик за Алта банка: Продажбата на акционерскиот пакет по моделот „сè или ништо“
Продажбата ќе се спроведе преку Македонската берза на хартии од вредност по моделот „сè или ништо“. Ова значи дека потенцијалниот инвеститор ќе мора да го откупи целиот понуден пакет, без можност за купување само на дел од акциите.

Народната банка официјално ја започна постапката за продажба на доминантниот акционерски пакет на „Алта банка“ АД Битола, со цел изнаоѓање нов сопственик, стабилизирање на нејзиното работење и зачувување на интересите на штедачите и клиентите.
На продажба се нудат вкупно 372.742 обични акции, што претставува 95,336 отсто од вкупниот број акции на банката. Овој пакет досега беше во сопственост на „Алта банка“ АД Белград, која моментално е во стечај.
Како што информираат од Народната банка, продажбата ќе се спроведе преку Македонската берза на хартии од вредност по моделот „сè или ништо“. Ова значи дека потенцијалниот инвеститор ќе мора да го откупи целиот понуден пакет, без можност за купување само на дел од акциите.
Првата јавна берзанска аукција е закажана за 30 ноември 2026 година, а почетната цена е утврдена врз основа на тековната берзанска цена и изнесува 3.777 денари по акција. Доколку акциите не добијат купувач на првата аукција, Народната банка предвидува последователни аукции кои ќе се одржат на 1, 2, 3, 4 и 7 декември 2026 година. Правилото за овие аукции е дека почетната цена ќе се намалува за 10 отсто во однос на цената од претходниот неуспешен обид.
Сите заинтересирани инвеститори кои сакаат да учествуваат на аукцијата имаат рок најдоцна до 19 ноември 2026 година да достават барање до Народната банка за добивање претходна согласност за стекнување квалификувано учество. Покрај ова барање, тие мора да приложат и писмена изјава како гаранција дека ќе ги уплатат средствата потребни за купување на акциите, согласно законските услови.










