ВЕСТИМАГАЗИН
Во тренд

Расел Бренд осуден на 10 години и шест месеци затвор за силување и сексуални напади

Британскиот комичар и актер е прогласен за виновен за силување на една жена и сексуални напади врз три други. Судот во Лондон му изрече затворска казна, а полицијата истражува и две дополнителни пријави за силување.

Британскиот комичар и актер Расел Бренд е осуден на 10 години и шест месеци затвор за силување на една жена и сексуални напади врз три други жени, соопштија денеска британските медиуми, повикувајќи се на судските постапки во Лондон.

Казната му беше изречена во понеделникот, 9 ноември, пред судот Саутворк Краун во Лондон, откако минатата недела поротата го прогласи за виновен по четири точки од обвинението.

Според пресудата, кривичните дела биле извршени во периодот од 2004 до 2009 година. Бренд (51) е осуден за едно силување и три сексуални напади. Судот го ослободи од обвиненијата за уште две силувања и обид за недоличен сексуален напад.

Судијата Џоел Бенатан, при изрекувањето на казната, го опиша Бренд како сексуален предатор кој верувал дека славата му дозволува да постапува како што сака, без да ги почитува правилата што важат за другите луѓе.

Според одлуката на судот, Бренд ќе мора да отслужи две третини од казната во затвор, пред да може да биде ослободен под услови на надзор.

Жртвите сведочеа за последиците од нападите

За време на судењето, кое траеше четири недели, беа разгледани сведочењата на шест жени кои го обвинија Бренд за сексуални напади во периодот од 1999 до 2009 година.

Една од жените, која била силувана во 2009 година, во изјавата прочитана пред судот опишала дека последиците од нападот и по повеќе од 15 години продолжуваат да влијаат врз нејзиниот живот. Таа сведочела дека имала проблеми со спиењето и исхраната и тешкотии во справувањето со емоционалните последици.

Бренд ги отфрли обвиненијата и тврдеше дека сите негови сексуални односи биле со согласност на жените.

Неговата одбрана, пак, пред изрекувањето на казната побарала од судот да ја земе предвид промената во неговиот живот, посочувајќи дека тој денес е поинаква личност и дека се справил со зависностите од алкохол и дрога.

Лондонската Метрополитен полиција соопшти дека Бренд и понатаму е предмет на истрага за уште две наводни силувања, од кои едното се однесува на девојка која во времето на наводниот напад имала 16 години.

По изрекувањето на казната, полицијата ја истакна храброста на жените кои пријавиле сексуално насилство и сведочеле во постапката. Бренд ќе биде впишан и во регистарот на сексуални престапници доживотно.

Back to top button