Соединетите Американски Држави започнаа „тежок бран“ напади врз Иран по петдневна пауза, како одговор на иранските ракетни напади врз американските сили еден ден претходно. Според извештаите на иранските медиуми, во нападите загинале цивили, вклучувајќи брачна двојка и нивното двегодишно дете.
Централната команда на американската армија (ЦЕНТКОМ) соопшти дека успешно завршила силни удари врз десетици цели на Корпусот на Исламската револуционерна гарда (ИРГЦ). Цел на нападите биле воени командни центри, капацитети за ракети и дронови, како и локации за крајбрежна одбрана. Акцијата уследи само неколку часа откако американскиот претседател Доналд Трамп вети дека САД „многу силно“ ќе го удрат Иран, пренесува Ал Џезира.
U.S. forces began launching strikes against Iran at 8 p.m. ET today. The strikes are a powerful response to yesterday’s attempted Iranian attacks on U.S. forces based in the Middle East.
— U.S. Central Command (@CENTCOM) July 30, 2026
Иранските медиуми известија за бомбардирања во јужните и југозападните провинции, особено долж Заливот и Ормускиот теснец. Погодени се локации на островот Кешм, каде што загинала цивилната двојка, како и градовите Ахваз, Абадан, Бушер, Казерун и Фарашбанд. Во Ахваз се пријавени и прекини на електричната енергија. ИРГЦ дополнително потврди дека во ракетните напади загинале тројца нивни припадници. Иран порача дека отпорот ќе продолжи сè додека траат американските закани и вети брз одговор.
Во меѓувреме, ескалацијата се прошири низ регионот откако Јордан и Кувајт пријавија ирански напади на нивна територија. Јорданските вооружени сили пресретнаа пет ирански ракети без пријавени жртви, додека кувајтското Министерство за одбрана соопшти дека ирански напад погодил зграда на кинеска компанија на северот од земјата, при што загинал еден работник. Саудиска Арабија остро ги осуди иранските напади врз Јордан како директно кршење на меѓународното право и принципите на добрососедство.
И покрај интензивните воени дејствија, дипломатските канали сè уште не се целосно затворени. Пакистан соопшти дека преговорите меѓу Техеран и Вашингтон за деескалација продолжуваат. Иранското Министерство за надворешни работи тврди дека Ормускиот теснец е затворен исклучиво поради американската агресија, додека САД воведоа нови санкции за две ирански фирми обвинети за учество во шема за принудна наплата на осигурување од комерцијалните бродови.
Безбедносните аналитичари и поранешни претставници на Пентагон оценуваат дека последните американски напади не биле целосно разорни, што сугерира дека Вашингтон се обидува да ја задржи пропорционалноста и да остави отворена врата за дипломатско решение, додека истовремено врши притисок за прекинување на иранската контрола врз глобалниот бродски сообраќај.
Редакција Брц









