До 40 степени денеска во Македонија, попладне можни дожд, грмежи и град
Македонија денеска, 23 август, ќе биде под влијание на многу топло време, но во попладневните часови се очекува дестабилизација на атмосферата со услови за локални поројни врнежи, грмежи и невреме. Според прогнозата на Управата за хидрометеоролошки работи (УХМР), минималните температури ќе се движат од 13 до 21 степен, а максималните ќе достигнат од 32 до 40 Целзиусови степени.
Во претпладневните часови времето ќе биде претежно сончево и многу топло, со мала до умерена локална облачност. Попладне, наместа облачноста ќе се зголеми и ќе се создадат услови за краткотраен пороен дожд, грмежи и засилен ветер.
Локално се можни и поинтензивни атмосферски процеси во форма на невреме, проследени со силни налети на ветер и појава на град. Поради локалниот карактер на нестабилноста, врнежите нема да ја зафатат целата територија на земјата истовремено.
Во Скопје денеска ќе биде сончево и топло со мала до умерена облачност. Попладне во делови од Скопската Котлина ќе има услови за краткотраен пороен дожд и грмежи. Ќе дува слаб до умерен ветер од северен правец, а температурата ќе се движи од околу 20 степени наутро до 37 степени во текот на денот.
За Скопскиот регион е активно и жолто предупредување поради исклучително високите температури во периодот од 10 до 18 часот.
Од почетокот на новата работна недела се очекува постепено намалување на дневните температури за неколку степени. Сепак, нестабилноста ќе продолжи, особено во понеделник, кога повторно локално се очекуваат пороен дожд, грмежи и засилен ветер, а наместа ќе има услови и за невреме со град.
Највисоките температури денеска повторно ќе бидат близу 40 степени, па топлото време останува главната карактеристика на денот, и покрај очекуваната попладневна нестабилност.
