БАЛКАНВЕСТИСВЕТ

Зеленски утре во прва официјална посета на Србија

Украинскиот претседател Володимир Зеленски утре, 8 август, ќе престојува во прва официјална посета на Србија, каде што ќе биде примен од српскиот претседател Александар Вучиќ, објави Радио-телевизија Србија, повикувајќи се на Службата за соработка со медиумите на претседателот на Републиката. Тоа ќе биде прва билатерална посета на Зеленски на Белград откако ја презеде функцијата претседател на Украина.

Вучиќ изјави дека со Зеленски ќе разговара за повеќе теми, меѓу кои европскиот пат на двете земји, билатералната економска соработка и енергетиката. Тој оцени дека Србија и Украина се соочуваат со слични предизвици во процесот на европска интеграција и дека постои простор за меѓусебна поддршка и размена на искуства.

Двајцата претседатели досега се сретнале повеќепати на меѓународни самити и конференции. Н1 Србија потсетува дека првите директни разговори од почетокот на руската инвазија се одржале во август 2023 година во Атина, на самитот Украина – Југоисточна Европа, а Вучиќ подоцна учествуваше и на самит во Одеса во 2025 година.

Една од чувствителните теми во односите меѓу Белград и Киев останува политиката кон Русија. Вучиќ во пресрет на посетата повтори дека Србија нема да ја менува досегашната позиција и дека, барем засега, нема да се приклучи кон санкциите против Москва.

Српскиот претседател воедно нагласи дека Украина не ја признала независноста на Косово, што Белград го смета за важен елемент во билатералните односи. Според него, тоа е став што Србија мора да го почитува.

Посетата на Зеленски доаѓа во период кога Белград и Киев настојуваат да ја засилат политичката и економската соработка, додека Србија истовремено се обидува да ја задржи сопствената политика кон Русија и да продолжи со европските интеграции.

Back to top button