ВЕСТИСПОРТ

Светски и европски шампиони во Скопје: Почнува 55. издание на боксерскиот турнир „Златен гонг“

Од 13 до 15 ноември, салата „Расадник“ е домаќин на 89 боксери од 20 земји. Влезот е слободен, а публиката ќе има можност да гледа борби со врвни имиња, меѓу кои и украинскиот светски првак Јуриј Захарјејев.

Македонската престолнина овој викенд е центар на европскиот бокс. Од 13 до 15 ноември, во салата „Расадник“ во скопската населба Кисела Вода се одржува јубилејното 55. издание на „Златен гонг“, еден од најстарите и најреномираните меѓународни боксерски турнири во Европа. Во организација на Македонската боксерска федерација, на турнирот ќе ги вкрстат ракавиците 89 натпреварувачи во машка и женска конкуренција, кои доаѓаат од 20 различни држави.

Турнирот годинава може да се пофали со исклучително силна конкуренција и присуство на ѕвезди од светскиот ринг. Меѓу најзвучните имиња е Украинецот Јуриј Захарјејев, кој е сениорски светски шампион од Белград во 2021 година. Тој влезе во историјата на боксот откако на само 19-годишна возраст стана првиот боксер што во иста година освоил светско злато и во младинска и во сениорска конкуренција. Покрај него, во Скопје ќе настапи и неговиот сонародник Данило Жасан, освојувач на бронзен медал од сениорското Светско првенство во Ливерпул (2025). Украинскиот тим е дополнително засилен со Џамал Кулијев (европски шампион до 23 години) и Матвиј Ражба (европски шампион до 17 години).

Во женска конкуренција вниманието ќе биде насочено кон четвртфиналната борба во категоријата до 80 килограми, каде македонската боксерка Марија Костовска ќе се соочи со Украинката Ирина Луцак – актуелна европска шампионка (У23) и освојувачка на сениорска европска бронза од Софија (2026). Во женскиот состав на Украина се и трофејните Наталија Меринова и Анастасија Сарањук.

Силни репрезентации носат и останатите земји-учеснички. Од Литванија доаѓа европскиот вицешампион (У23) Александар Трофимчук, кој во финалето во Софија боксуваше токму против Захарјејев, како и искусните Едгарас Скурделис и Алгирдас Баниулис. Молдавија е предводена од повеќекратниот медалист Даниил Гуранда, заедно со освојувачите на европска бронза Михај Поромбак и Владислав Васковски. На рингот во „Расадник“ публиката ќе може да ги види и освојувачите на европски медали: Румен Руменов од Бугарија, Хамза Рашљанин од Србија и Башким Бајоку од Косово.

Македонската боксерска федерација упати отворена покана до сите љубители на боксот и спортот да ги проследат борбите и да им дадат поддршка на домашните натпреварувачи, потенцирајќи дека влезот за сите денови е бесплатен.

Програмата во салата „Расадник“ е следна: • Петок, 13 ноември, од 14:00 часот – четвртфинални борби • Сабота, 14 ноември, од 14:00 часот – полуфинални борби • Недела, 15 ноември, од 17:00 часот – финални борби

Поврзани вести

Back to top button