ВЕСТИВИДИГИТАЛМАКЕДОНИЈА

Мицкоски го промовираше проектот „Везилка“: Македонија добива Национален центар за вештачка интелигенција

Претседателот на Владата, Христијан Мицкоски, преку официјално соопштение го поздрави почетокот на проектот „Везилка“, со кој се воспоставува Националниот центар за вештачка интелигенција. Премиерот истакна дека станува збор за стратешка инвестиција чија вредност надминува поединечен инфраструктурен проект, со оглед на тоа што директно ја менува насоката во која се движи македонското општество. Проектот претставува вложување во потенцијалот на домашните научници, истражувачи, студенти и компании, со јасна определба државата да биде активен учесник во технолошките процеси кои го диктираат современиот свет и новите економски модели.

Иницијативата е плод на заедничка визија на Владата, академската заедница и Европската Унија, поддржана од Министерството за дигитална трансформација. Центарот ќе им овозможи на македонските универзитети, истражувачи и стартап заедницата директен пристап до европската инфраструктура за вештачка интелигенција и напредни суперкомпјутерски капацитети. Ваквиот чекор, според премиерот, ќе создаде реални услови домашните иновативни идеи да се натпреваруваат на глобално ниво, што дополнително ќе го поттикне економскиот раст, ќе отвори нови работни места и ќе понуди перспективна иднина за младите генерации во сопствената земја.

Развој на македонски јазични модели како прашање од национално значење

Како универзитетски професор, Мицкоски потенцираше дека луѓето и нивното знаење се најсилниот ресурс на државата, поради што секоја инвестиција во науката носи најголем поврат за општеството.

„Особено значење има и фактот што ‘Везилка’ ќе придонесе за развој на македонски јазични модели и дигитални алатки на македонски јазик. Во време кога новите технологии сè повеќе стануваат простор во кој се создава и споделува знаење, присуството на сопствениот јазик претставува прашање на културен континуитет, научен развој и национална самодоверба. На тој начин се создаваат услови македонскиот јазик да биде рамноправно присутен во современите технолошки процеси и достапен за идните генерации во дигиталната ера“, порача Христијан Мицкоски.

На крајот од своето обраќање, премиерот упати искрени честитки до Факултетот за информатички науки и компјутерско инженерство (ФИНКИ) и Универзитетот „Св. Кирил и Методиј“ за нивната стручност и посветеност, како и благодарност до Европската Унија за довербата. Тој заклучи дека „Везилка“ е почеток на долгорочен процес кој ќе ја позиционира Македонија како модерна и конкурентна држава која ја поддржува иновативноста и ја гради иднината со домашен потенцијал и домашна експертиза.

Поврзани вести

Back to top button