Привремено стопирана БСЖ вакцината во Македонија: По алармот во Хрватска, здравствените власти бараат проверка на сериите
Комисијата за имунизација при Министерството за здравство донесе одлука за времено одложување на имунизацијата со БСЖ (BCG) вакцината во државата. Оваа итна мерка следи по информациите од хрватските медиуми за сериозни несакани реакции кај доенчиња кои биле имунизирани со вакцина од истиот производител.
Имајќи предвид дека станува збор за ист производител, Комисијата веднаш стапила во контакт со Агенцијата за лекови и медицински средства (МАЛМЕД) и побарала информации за сериите на вакцини што се користат во нашата држава. Имунизацијата со БСЖ вакцината ќе биде одложена сè до добивање комплетни информации во однос на сериите, нивниот квалитет и можната асоцираност со појавата на несакани реакции.
Што се случи во Хрватска?
Според извештаите од Хрватска, Хрватската агенција за лекови и медицински производи (ХАЛМЕД) привремено ја запре дистрибуцијата и употребата на оваа вакцина. Вакцината ја произведува компанијата „Bul Bio NCIPD Ltd.“ од Софија, Бугарија, а суспензијата се спроведува како мерка на претпазливост поради сомневања за недостатоци во квалитетот, објави Индекс.хр. Причината е што во текот на 2026 година биле пријавени четири сомнителни случаи на остеитис, односно остеомиелитис (воспаление или инфекција на коската), кај мали деца. Ова е позната, но многу ретка несакана реакција на БСЖ вакцината. Споредбено, во периодот од 2005 до 2025 година, хрватските здравствени власти регистрирале само една ваква пријава. Сомнителните случаи се појавиле откако во период од околу година и пол биле аплицирани околу 60.000 дози од вакцината.
Состојбата со туберкулоза и безбедноста во Македонија
Министерството за здравство потенцира дека имунизацијата со оваа вакцина во нашата држава е задолжителна, имајќи предвид дека земјата е со висок ризик од туберкулоза. Бројките покажуваат дека во моментот на Институтот за ТБЦ се лекуваат 95 пациенти со туберкулоза, од кои 83 се дијагностицирани годинава. Во Детската болница „Козле“ лани биле евидентирани 15 случаи, додека во 2026 година има 12 нови случаи.
Надлежните смируваат дека во изминатите десет години до МАЛМЕД е пристигната само една пријава за сомнеж на несакана реакција од БСЖ вакцина. Пријавата е од август 2022 година и се однесувала на појава на апсцес на местото на апликација, што е реакција која е веќе опишана во упатството за употреба на вакцината.










