ВЕСТИХРОНИКА

ПАТРОЛА: Драматична бркотница со шумската полиција во Желино, уапсен документарист во МВР за закани и шокантен случај со заклучени малолетнички во Скопје

Обид за прегазување на шумски полицаец во Желино, скандалозни закани од документарист вработен во МВР и фатен малолетник со пиштол во тетовско училиште го одбележаа полицискиот билтен. Деноноќието носи и вознемирувачки случај во Скопје каде две малолетнички цела ноќ биле држени заклучени во возило од нивен врсник.

Обид за прегазување на шумски полицаец, скандалозни закани упатени од вработен во МВР и вознемирувачки случај во кој малолетник против нивна волја заклучил две малолетнички во автомобил во Скопје, се главните инциденти нотирани во најновиот полициски билтен.

Вистинска филмска бркотница се одвивала вчера во атарот на тетовското село Желино. Педесет и тригодишен маж кој управувал „форд“ без регистарски ознаки, натоварен со огревни дрва, одбил да застане на даден знак од патрола на Шумската полиција. Наместо тоа, тој ја зголемил брзината и се обидел директно да удри во еден од шумските полицајци, по што избегал. Полицијата брзо го идентификувала и го лишила од слобода.

Во меѓувреме, Одделот за внатрешна контрола при МВР расчистува сериозен скандал во сопствените редови. Поднесена е кривична пријава и предлог за суспензија против документарист од Отсекот за статистика во Кисела Вода. Тој е осомничен дека преку мобилна апликација испраќал заканувачки пораки на скопјанец, поради претходно недоразбирање поврзано со неговиот син.

Деноноќието носи и исклучително загрижувачки случај на малолетничка деликвенција. Скопјанка пријавила дека нејзината 12-годишна ќерка, заедно со нејзина малолетна другарка, била држена против нејзина волја заклучена цела ноќ во патничко возило од страна на малолетник, откако претходно се сретнале во паркот Сарај. Полицијата презема интензивни мерки за целосно расчистување на овој шокантен настан. Насилството меѓу младите зема замав и во Тетово, каде во средно училиште, во присуство на родител и педагог, е уапсен 15-годишник кај кого е пронајден пиштол „Зораки“ калибар 9 милиметри со рамка.

Полицискиот извештај бележи и серија агресивни инциденти кон службени лица. Во Гостивар е уапсен 29-годишник кој со 1,95 промили алкохол во крвта упатувал закани и пружал активен отпор на полицајци, додека во казино во Центар се приведени маж и девојка поради агресивно однесување кон полициска патрола. Црната хроника регистрира и сериозни случаи на семејно насилство, меѓу кои се издвојува апсењето на 72-годишен старец во гевгелиско село, кој со фрапантни 2,22 промили алкохол агресивно се однесувал кон својата сопруга.

Back to top button