ВЕСТИМАКЕДОНИЈАСКОПЈЕТРЕНД

Започнува второто издание на „AERO Street Food Festival“ во паркот Авионче

Второто издание на урбаниот фестивал за улична храна и музика, „AERO Street Food Festival“, ќе се одржува од 4 до 8 септември во паркот „Авионче“ во скопската општина Аеродром. Посетителите ги очекува богат петдневен настан кој нуди дваесет различни гастрономски брендови, домашна музичка програма, разновидни забавни содржини и бесплатен влез за сите граѓани.

Оваа година главниот фокус на фестивалот е ставен на храната, нудејќи комбинација на вкусови инспирирани од светските кујни и локалните скопски класици. На една голема маалска трпеза на отворено, посетителите ќе можат да избираат меѓу свежо суши, такоси, бургери, гиро, пица, фокача, ќебапи, печени компири, како и разни солени и слатки задоволства, вклучувајќи десерти како палачинки, сутлијаш и сладолед. Во богатата гастрономска понуда учествуваат познати градски брендови меѓу кои Burgerslut, Mustacos, Loras Sushi, Fat Kitchen, Jojo’s BBQ, Oljo’s, Noa Gyradiko, Scoop, Bistro 64, Smash Burger, Sorelle, 11: Eleven, „Сутлијаш бар“, „15 за 12“, „Трансилваниско трдло“, Pizza Vice City, „Дестан“, Milkey, Sweet Look и „Жешко компирче“.

За добрата атмосфера во текот на сите пет вечери ќе се погрижат повеќе домашни бендови и диџеи. На музичката сцена ќе настапат бендовите South Park, Ringtones, Dopamine, Marbel и Acoustic Division, додека за забавата пред и по концертите ќе бидат задолжени Милан Серафимов, Александар Јорданов, „Јанко петел јаваше“, DJ Marko, DJ Vaso, DJ Rizinski, диџеите од Fluere, DJ Guardian, DJ Ficho и Sure Shotz.

Покрај храната и музиката, секоја вечер ќе биде исполнета со дополнителни забавни содржини под водство на Бомбакис, кој ќе организира натпревари во брзо јадење, квизови и предизвици со публиката. Фестивалот ќе биде отворен секој ден од 17:30 до 00:30 часот, а настанот е поддржан од Општина Аеродром како спонзор и Град Скопје како покровител, во организација на Lions in Move и Café Mambo.

Поврзани вести

Back to top button