ВЕСТИЗЕЛЕНАСКОПЈЕ

Лансирана „ЕкоСкопје“: Нова дигитална платформа создадена од млади за пријавување еколошки проблеми

Граѓаните на Скопје од денеска имаат на располагање нова дигитална алатка за пријавување еколошки проблеми преку официјалното лансирање на паметната еко-платформа „ЕкоСкопје“, информираат од здружението Лидери за едукација, активизам и развој (ЛЕАД).

Според соопштението од организаторите, платформата е достапна на веб-страницата ekoskopje.skopje.gov.mk и овозможува граѓаните да пријават проблем преку приложување фотографија и точна локација. Од ЛЕАД појаснуваат дека пријавите се евидентираат во системот и се проследуваат до соодветните градски служби, по што се ажурира нивниот статус, со цел подобра и поорганизирана комуникација. Оваа платформа е резултат на младинска идеја развиена преку проектот „SkopYEAH!“, во соработка со Град Скопје и со финансиска поддршка од Европската Унија.

Официјалната промоција се одржа денеска во „Europe House Скопје“, каде претставникот на Европската комисија, Еваут Сандкер, истакна дека покрај технологијата, неопходно е и менување на однесувањето на граѓаните кон околината. Градоначалникот Орце Ѓорѓиевски ги повика скопјани да ја користат алатката, потенцирајќи дека трудот на младите заслужува признание и дека е обврска на институциите нивните предлози да добијат примена. На настанот се обрати и извршниот директор на ЛЕАД, Иван Јованов, додека членот на победничкиот тим, Андреј Божиновски, ја претстави функционалноста на веб-платформата пред присутните.

Поврзани вести

Back to top button