Соединетите Американски Држави загубиле или претрпеле оштетување на најмалку 81 воен авион во војната со Иран, покажува нов извештај на Конгресната истражувачка служба (CRS), објавен оваа недела.
Според анализата на Си-Ен-Ен, бројката ги опфаќа авионите, хеликоптерите и беспилотните летала, а повеќе од половина од загубите се однесуваат на беспилотните летала MQ-9 Reaper.
Овие дронови се користат за разузнавање, надзор и извидување, блиска воздушна поддршка и борбено спасување. И покрај големите загуби, американскиот началник на штабот на воздухопловните сили, генералот Кенет Вилсбах, претходно го опиша MQ-9 како „најкорисниот играч“ на американската страна во војната со Иран.
На листата на оштетени или уништени летала се наоѓаат и некои од највредните средства на американската војска, меѓу кои борбен авион F-35A и авион E-3 Sentry. Станува збор за четиримоторен авион со голем радар на трупот, наменет за следење цели и управување со воздушниот простор.
Според проценките на Конгресната истражувачка служба, замената на изгубените летала би чинела меѓу 1,9 и 3,3 милијарди долари, зависно од плановите на Министерството за одбрана за нивна замена. Податоците за трошоците се преземени од Конгресната буџетска служба.
Вкупната финансиска цена на војната е, сепак, значително поголема. Според извори на Си-Ен-Ен досега таа изнесува најмалку 45 милијарди долари, без да биде пресметана штетата врз американската инфраструктура во регионот, вклучително и базите каде што биле уништени или оштетени дел од леталата.
Не сите 81 летала мора да се сметаат за трајно изгубени. Некои од оштетените авиони можеби веќе се вратени во употреба. Меѓу нив се и осум ловци F-15 Strike Eagle, кои претрпеле полесни оштетувања при ирански напад врз воздухопловната база „Мувафак Салти“ во Јордан во септември.
Извештајот на CRS се темели на податоци од соопштенија и извештаи на американското Министерство за одбрана, генералниот инспектор на Пентагон, Централната команда на САД, која ги спроведува операциите против Иран, како и на медиумски извештаи.
Конгресната истражувачка служба, меѓу другото, поставува прашање дали Конгресот добива доволно информации од Пентагон за загубите за да може соодветно да ги процени нивните последици и да одлучи за потребните мерки.
Посебно внимание во извештајот е посветено на MQ-9 Reaper. Според извештај на Атлантскиот совет од септември, 45 вакви беспилотни летала биле загубени на Блискиот Исток само оваа година, што било оценето како „алармантна стапка“.
Американското воздухопловство, според истиот извештај, изгубило околу 35 отсто од своите MQ-9 Reaper од нивното воведување во употреба во 2004 година.
CRS предупредува дека Конгресот ќе мора да разгледа и пошироки последици од загубите – од обезбедување средства за поправка и замена на леталата, преку капацитетите на американската воена индустрија да ги надомести загубите, до можните последици врз испораките на оружје за странските сојузници.
Дополнително, се поставува прашањето дали ангажманот во војната со Иран влијае врз американските воени капацитети и присуството во други региони надвор од Блискиот Исток.









