Голем шумски пожар избувна денеска на грчкиот полуостров Халкидики, принудувајќи стотици туристи и локални жители да бидат евакуирани по копно и по море, јавуваат грчките медиуми и светските агенции. Огнот, поттикнат од силни ветрови, се прошири во близина на туристичкото место Сивири на полуостровот Касандра, каде што во екот на летната сезона престојуваат илјадници посетители.
⚠️🔥 Εκτός ελέγχου η #πυρκαγιά στο πρώτο πόδι #πυρκαγιά #Χαλκιδικής καίγονται σπίτια οι φλόγες μέσα σε ξενοδοχειακές μονάδες
Βίντεο : εποχικοί πυροσβέστες pic.twitter.com/CzfiP0RdJb
— Forecast Weather Greece (@ForecastGreece) August 13, 2026
Според информациите што ги пренесува грчкиот портал „Прототема“, пламените јазици зафатиле шумски површини и се доближиле до куќи и туристички апартмани, поради што властите наредиле итна евакуација на загрозените подрачја. Повеќе од 300 лица биле префрлени со чамци и бродови од крајбрежниот дел на Сивири, во операција во која учествувале крајбрежната стража, противпожарни пловила и приватни бродови.
🔥#Πυρκαγιά πάνω απ’ τη #Σίβηρη Χαλκιδικής γίνεται κένωση pic.twitter.com/WHXo6BdxYS
— Forecast Weather Greece (@ForecastGreece) August 13, 2026
Во гаснењето на пожарот се вклучени повеќе од 140 пожарникари, девет авиони и седум хеликоптери, кои се обидуваат да го стават огнот под контрола од двете страни на главниот пат што ги поврзува Сивири и Касандрија. Еден пожарникар е повреден, а сообраќајот во дел од областа е прекинат.
Портпаролот на грчката противпожарна служба, Јанис Артопиос, за „Прототема“ изјавил дека приоритет на службите е безбедната евакуација на населението и локализирањето на пожарот.
Халкидики, една од најпопуларните туристички дестинации во северна Грција, ова лето се соочува со зголемен ризик од пожари поради високите температури, сушата и силните ветрови. Според грчките власти, повеќе региони во земјата се наоѓаат под највисоко ниво на опасност од шумски пожари.
Пожарот е дел од поширокиот бран екстремни временски услови што ја погодуваат Европа, каде што топлотните бранови и сушните периоди значително го зголемуваат ризикот од големи шумски пожари.








