
Гласот на Бразилката Силвија Греко стана очите преку кои нејзиниот син кој е слеп го доживува светот. Нејзината неверојатна посветеност да му го доближи секој детаљ од животот и од фудбалските натпревари на малиот Николас, не само што го освои светот, туку во 2019 година ѝ ја донесе и престижната награда „FIFA Fan Award“.
Нејзината приказна стана глобален симбол на инклузијата и на напорите лицата со попреченост да бидат активен дел од општествениот живот, наместо да бидат оставени на неговите маргини.
Николас е роден предвреме и поради компликации при раѓањето останал без вид, а подоцна му бил дијагностициран и благ аутизам. Наместо неговата состојба да биде пречка за учество во заедничките активности, неговата мајка пронашла начин да му овозможи рамноправно да ги доживува настаните што ги сака. Таа со години детално му ги опишува случувањата околу него, пренесувајќи му не само информации, туку и емоции, атмосфера и чувство на припадност.
Приказната привлече светско внимание кога телевизиски камери ја снимија како му го објаснува секој момент од натпревар додека седи покрај него на трибините.
Снимката брзо се прошири низ Бразил и светот, а многумина во неа препознаа пример за тоа како малите секојдневни гестови можат да ги урнат бариерите со кои се соочуваат лицата со попреченост.
Во своето образложение, ФИФА истакна дека примерот на Силвија покажува дека спортот и јавните простори треба да бидат достапни за сите. Самата таа нагласува дека нејзината улога е да му помогне на синот да го почувствува светот околу себе, овозможувајќи му да биде дел од заедницата и од искуствата што другите ги земаат здраво за готово.
(Во видеото на Сантандер, е претставен и уред што им овозможува на сите лица со оштетен вид да го почувствуваат фудбалот.)
Нејзината приказна денес често се наведува како пример дека инклузијата не започнува со големи политики и проекти, туку со подготвеноста на општеството да создаде услови секој човек да учествува, да комуницира и да ги споделува истите искуства со останатите. Во случајот на Силвија и Николас, токму љубовта, посветеноста и разбирањето покажаа како може да се надминат ограничувањата што ги наметнува попреченоста.
Редакција Брц.










